Sirata Chjam'è rispondi di a viciglia di Natale 2011. Auditoriu di Pigna.
Quale hè chì hà dettu chì l’arte di l’impruvisata andava à spegne si ?
Quellu chì l’hà pensata seria statu bellu stupitu, issa sera, d’assiste à l’adunita di più d’una quindecina di pueti. Ma non solu per u fattu d’esse numerosi, chì hè di già un affarone, ma per a ripresentazione giuvanile. Eranu sei à dà a risposta à l’anziani. È di chì manera ! Cù u versu, u spiritu è e l’estru di e zircate chì cunvenenu. À talpuntu chì, per un pocu, s’indisponenu « i vechji ». Diceremu, per ùn offende à nisunu, ch’elli si sò un suppulellu inzirmiti. Di sente si pizzicà d’issa manera i facia trinnicassi nant’à e so sedie. Ciò chì hà fattu nasce, per u piacè di tutti, un bellu cuntrastu è ùn si ne tenerà per prova chè e reazzione, e sciaccamanate è e risate d’un publicu, venutu ancu ellu numerosu à assite à issu cumbattimentu. È assai piacevule era issu intuppu. Ciò chì hà fattu dì à una persona, vicinu à mè : « A sumente ci hè, è ùn dumanda chè à fà spica ! » Una sola dilusa, issa sera, l’assenza di u Rusignolu di Ziglia, indispostu per una volta. Ellu chì ùn ne mancava mai una di porghje u so versu fine è savuritu. Ma i so pari ùn anu mancatu di salutà lu. È quessu era l’onore ch’ellu si meritava.
Guidu Benigni.
I pueti...
Ghjaseppa Geronimi, Pietralba
Olivier Ancey, Lozzi
Ghjaseppu Micaelli, Ghisoni
Francescu Gras, Santa Reparata di Balagna
Brandone Andreani, Suddacarò
Francescu Luciani, Pietralba
Lisandru Moretti, Tralonca
Tittò Limongi, Velone Ornetu
Carlinu Orsucci, Tallone
Paulu Calzarelli, Carticasi
Luiggi Savignoni, a Petra di Verde
Petru Santucci, Perelli d'Alisgiani
Bastianu Campana, Canale di Verde
Ghjuvan'Luiggi Villanova, Calinzana
Ghjuvan'Battista Albertini, Lucciana
Don Marcu Battini, Bustanicu
Ghjuvan'Petru Ristori, a Riventosa
|
Feed Entries